5. Diciembre 2009 by Outes.

Dende fai xa unha semana tiña pendente este post, pero tiven un par de exames esta semana, así que tiven que deixalo para a fin de semana.
O 27 de Novembro conmemórase o fusilamento dos mártires de medicina. Este ano foi o 138 aniversario. É unha boa mostra do que era o imperialismo español
Que pasou o 27 de Novembro de 1871?
O día 23 de Novembro dese ano uns estudantes de primeiro ano de medicina foron a clase, e como non asistiu o profesor saíron xogar. Ó lado do centro de estudos atopábase o Cementerio de Espada, e estiveron na porta xogando cunha carretilla, e incluso un deles arrancou unha flor do xardín! [E a xente dirá: xogando cunha carretilla universitarios? Nesa época había estudantes que tiñan até uns 14 anos]. Facía uns días morrera o xornalista español Gonzalo Castañón nos Estados Unidos nun duelo cun cubano. Este xornalista resultaba ser un valuarte do colonialismo e a anexión total de Cuba por España. Así, as autoridades españolas de Cuba decidiron unha vinganza: deter a todos os alumnos que o día 23 de Novembro estiveran xogando na porta do camposanto, onde estaba soterrado Gonzalo Castañón, baixo o pretexto de que profanaran a súa tumba [É importante dicir que nunca se probou esta profanación, porque moitísima xente pensa o contrario] Un total de 45 estudantes foron detidos, só salvándose 3 ausentes ese día e un sanitario español que foi deixado en liberdade. Posteriormente serían liberados os dous fillos de españois que había na aula e dous cubanos que eran familia do propio xuiz.

Ver resto de la entrada »

Publicado en Actos Oficiais, Personaxes Históricos, Historia de Cuba, Imperialismo, Educación | 3 comentarios »

22. Noviembre 2009 by Outes.

A semana pasada celebrouse o FULL, Festival Internacional da Lectural e o Libro, organizado pola Federación Estudiantil Universitaria (FEU). Entre o 13 e o 17 de Novembro realizáronse actos no Pavellón Cuba, que incluían a presentación de libros, lecturas e concertos. Tamén se puxeron dúas librerías, unha con novidades e a outra só con libros de segunda man. Estiven por alí 2 días, e puiden ver os libros rebaixados de prezo: un libro que costaría uns 15 pesos (50 céntimos de euro), e que ca rebaixa costaba 4 pesos (16 céntimos de euro). O dos prezos dos libros é algo que aínda me parece incrible. Espero con moitas ganas a Feira do Libro, porque din que alí os prezos son de risa.
En canto ós concertos, puiden ver un par de grupos de latin jazz, que sonou parecido a Chucho Valdés, pero sen el no escenario. Tamén ía ir un grupo de rock serbio, pero perderon o avión en Venezuela e aplazouse o concerto. Ademáis, polas tardes había trova na cafetería (volvín ver a Adrián Berasatain, teloneiro de Manu Chao), e polas noites grupos de rock ou jazz tocando até que pechaba o local.

Publicado en Actos Oficiais, Educación, Libros | Ningún comentario »

9. Noviembre 2009 by Outes.

Entre os días 30 de Setembro e o 8 de Novembro veuse celebrando na Habana o 13ª Festival Internacional de Teatro da Habana. Representacións dende máis de 15 países conformaron o cartel do festival, ademáis da presencia cubana. A maioría de grupos teatrais eran latinoamericanos, pero tamén participaron países europeos e africanos.
Só puiden asistir a 3 obras durante os 8 días (para que meus pais queden contentos: tiña moito que estudar!): unha cubana, outra ecuatoriana e a última francesa.
A primeira obra revivía a Karl Marx por pouco máis dunha hora: asistimos a un monólogo do propio Marx no Soho de New York sobre o mundo actual. Unha interpretación espectacular (se o actor tivese acento alemán e non cubano diría que non era unha obra), e unha crítica para reflexionar. Ataca directamente ó capitalismo, pero sen cortarse un pelo sobre o stalinismo, o trotskismo e o anarquismo, e facendo algún guiño á política cubana, tamén para criticala. Das obras que che fan pensar.
A obra ecuatoriana foi moi diferente. Realizouse no Teatro Mella (un dos máis grandes da cidade), e estaba case cheo. Xa comentei nalgunha ocasión como se comportan os cubanos no cine, e no teatro é exactamente igual. A xente fala de calquera cousa sen baixar a voz, soan móbiles, e incluso houbo unha persoa que se puxo a falar por el no medio da obra! Teño moi claro que non vou ir a eventos culturais en grandes edificios, porque son case desagradables. En canto á obra, tampouco foi a mellor que vin na miña vida, pero estivo bastante entretida.
Por último, fun ver unha obra francesa titulada “Rita et Luna, in extremis”. O interesante da obra era que os diálogos eran en francés! Polo tanto, dadas as miñas dotes con este idioma (graciñas Angelines…), non me enteraba de nada. Por sorte, había unha pantalla nunha esquina do escenario con parte dos diálogos, e as actrices sobreactuaban o suficiente como para máis ou menos saber de que ía a cousa. A representación foi divertidísima, só dúas actrices que amosaban o paso da súa vida.
Unha pena non poder ter visto máis obras, porque polas que vin, o festival valeu a pena!

Publicado en Actos Oficiais | 2 comentarios »

1. Octubre 2009 by Outes.

Hoxe, día 30 de Setembro, coincidindo co aniversario da chegada á Secretaría Xeral das FEU de José Antonio Echeverría, celebrouse o acto de presentación dos novos alumnos membros á Federación Estudantil Universitaria.
As FEU son a organización de masas máis antiga de toda Cuba. Todo estudante universitario pertence ás FEU por dereito, a cal ten as funcións de organización estudantil (fai charlas, pertence á Xunta de Goberno correspondente da Universidade, etc)
O acto realizouse na Praza do Campus universitario. Todos os alumnos de 1º ano (e os alumnos novos non de primeiro, como é o meu caso), reúnense alí por facultades, e entrégaselles o seu carnet das FEU. Este é o carnet que se utiliza como acreditación universitaria, non é que teñas outro da Universidade da Habana. Ver resto de la entrada »

Publicado en Actos Oficiais, Educación | 2 comentarios »

29. Septiembre 2009 by Outes.

Durante os días 20 a 26 de Setembro celebrouse o ISSEM (International Summer School in Economics and Management), un encontro anual realizado pola Universidade da Habana en colaboración ca Universität Humboldt de Berlín. Dos días 20 ó 24 realizáronse unha serie de cursos para alumnos cubanos e alemáns que cubrían unha serie de aspectos relacionados ca economía, dende a análise estatística á xestoría empresarial.
Os días 25 e 26 fixéronse charlas e mesas redondas de varios temas, ós que podía asistir todo o mundo. Todo o evento foi celebrado no hotel Habana Libre (famoso por ser ocupado polos revolucionarios unha vez tomada a Habana), que puxo a disposición da organización varias salas para as sesións. Realizáronse un total de 18 charlas nos 2 días, dende as 9 da mañá aś 7 da tarde. Ademáis había comida e cea no propio hotel para os inscritos. Eu non estaba inscrito, así que estiven 2 días comendo e ceando perritos diante do hotel!
O que me chamou a atención foi a cantidade de profesorado que asistiu ás charlas. Houbo varias nas que había máis de 100 persoas, e a maioría delas eran, sen dúbida, profesores. Algúns membros das FEU da miña Facultade estaban por alí, pero o número de estudantes era bastante escaso.
O sistema de charlas era sinxelo: había varios poñentes (3 nas que menos, nunha chegou a haber 7), dos cales un era alemán (profesores da universidade Humboldt, membros de ONGs, etc.) e o resto latinoamericanos, na súa maioría cubanos (escoitei xente de Bolivia, Perú ou Chile). A idea era unha serie de exposicións relativamente breves e un posterior debate. A temática era moi variada, eu non fun a ningunha das máis técnicas (métodos cuantitavos e cousas así…), pasei directamente ás de Globalización, desenvolvemento e crise económica.
Tiña ganas de ver conferencias, por se ía ser todo apoloxía do sistema, ou simplemente centrarse en política exterior e temas que non tivesen a Cuba no centro do debate. Sen embargo, quedei impresionado pola cantidade de opinións diferentes que escoitei. É evidente que moitos dos que falaban eran comunistas, pero todos os alemáns falaban do sector empresarial privado e de socialdemocracia. Houbo unha intervención nunha charla de Desenvolvemento Rural (un alemán que traballa para a ONG Welt Hunger Life, e leva en Cuba máis de 15 anos) totalmente en contra das políticas de desenvolvemento rural que se están levando a cabo. Dende logo foi moi intenso! E a única intervención ó rematar as presentacións (falaron 7 persoas en 2 horas e cuarto), procedente dun cooperativista, foi de apoio ó señor este. O clima foi moi interesante. Na mesa estaban 2 membros do Ministerio da Agricultura, así que dende logo a queixa chegou a onde tiña que chegar. Interesante ver que non todo é perfecto aquí, pero á vez que non son uns represores que non deixan dicir cousas, como os pintan! Polo xeral amosaron diversas liñas de actuación sobre os temas a tratar, e cal é a posición estatal para solventar os problemas. Había interevencións de profesores e traballadores dos ministerios pertinentes, polo que os puntos de vista eran diferentes, o que o fai máis atractivo.
Quedei totalmente impresionado pola calidade das charlas e pola cantidade de xente que participaba. Dende logo, 2 días moi intensos nos que aprendín de Economía.

Publicado en Actos Oficiais, Economia | Ningún comentario »

28. Septiembre 2009 by Outes.

Hoxe estase a celebrar en todo o país o 49 aniversario da creación dos Comités de Defensa da Revolución. Ver resto de la entrada »

Publicado en Actos Oficiais | Ningún comentario »

14. Septiembre 2009 by Outes.

O día 13 de Setembro, dende as 8 da mañá ás 8 da noite, foi xornada de Duelo Nacional pola morte do Comandante Juan Almeida Bosque. Todos os edificios públicos ondearon a bandeira cubana a media asta (algunhas embaixadas, como a de Guinea Bissau, tamén fixeron o propio ca súa bandeira), e en todas as capitais viñéronse celebrando diversas actividades en conmemoración do Comandante. O propio Almeida deixou escrito que non quería un acto de grandes magnitudes, polo que o seu corpo non foi ensinado ó público, e despois da súa incineración será soterrado nunha cerimonia con Honores Militares, pero sen grande presencia pública, na cidade de Santiago de Cuba, á que estivo moi vinculado durante toda a súa vida como guerrilleiro.
A Praza da Revolución da Habana pechouse durante todo o día para presentárselle alí respeto ó Comandante. No Memorial José Martí instalouse un pequeno espazo cunha foto e varias citas sobre el. Moitas delegacións internacionais levaron até alí flores, que pousaron ó redor do edificio.
Non podería dicir o número de miles de persoas que alí estabamos, pero a cola para a entrada era de máis de medio quilómetro. Estiven esperando para poder entrar máis de hora e media, e até as 8 da noite o fluir de xente era contínuo.
Dende a miña Beca organizouse unha camiñata até a Praza para que os estudantes que aquí estamos fóramos xuntos. Eu marchei demasiado cedo pola mañá, e non me enterei até a tarde, polo que non puiden ir con eles, e non sei se houbo algún acto feito polos estudantes.

Publicado en Actos Oficiais, Personaxes Históricos | 2 comentarios »

14. Septiembre 2009 by Outes.

Hoxe pola mañá (Sábado, día 12) levouse a cabo un acto en solidariedade cos 5 heroes, coincidindo co 11º aniversario da súa detención.
René, Gerardo, Fernando, Antonio e Ramón foron detidos fai 11 anos e acusados de terrorismo. Estos 5 cubanos estaban infiltrados nas organizacións terroristas de Miami, co único obxectivo de conseguir información en caso de atentado contra Cuba. Chegaron incluso a dar información ó goberno yanki sobre a existencia de armas en Miami que podían ser utilizadas tanto en USA como en Cuba. A resposta yanki foi a súa detención e a condena, nun xuizo case sumario, polas presións mediáticas de todo o sector máis reaccionario de Miami. As condenas suman 4 cadenas perpetuas e 77 anos de prisión. Sen embargo, o xuizo foi finalmente invalidado ante a parcialidade do xurado e as presións recibidas, polo que debe ser realizado de novo. Con esto, o xuizo ós 5 é o máis longo de toda a historia dos Estados Unidos.
O acto realizouse na Tribuna Antimperialista, diante da Oficina de Intereses Yanki. Dende as 8:30 até as 10:00, sucedéronse unha serie de Premios Nacionais de Poesía, que leron as súas obras en solidariedade cos 5 heroes. Tamén actuaron grupos de música, cantautores e o Coro Nacional de Cuba. Ante varios miles de persoas, o Presidente da Asamblea Nacional do Poder Popular de Cuba, Ricardo Alarcón de Quesada, deu un emotivo discurso, con palabras de respeto cara Obama (algo que non me esperaba) e un ton totalmente despectivo contra a familia Bush. Finalmente, cun “Hasta la victoria, siempre!”, pechou o acto.
É moi interesante a solemnidade ca que se fan este tipo de actos. Despois de 50 anos de Revolución e 11 de espera pola liberación dos 5, podería sonar un chiste estar alí escoitando estas cousas, pero moita xente está moi motivada respecto a este tema. As ganas de que volten a casa son latentes na xente, e parece que hai moitas esperanzas postas en que Obama leve a cabo un cambio na política exterior yanki con Cuba.

Publicado en Actos Oficiais, Imperialismo | Ningún comentario »