1. Julio 2010 by Outes.

Pido disculpas por estar 6 días sen dar sinais de vida, pero aproveitei un fin de semana libre que se me presentou para ir a Las Tunas, unha das provincias orientais do país, durante uns días.
Cidade tranquila e un bo sitio para descansar e poder estudar sen molestias

Publicado en Viaxes | 6 comentarios »

4. Junio 2010 by Outes.

O último post con fotos da viaxe a Oriente. Holguín é unha das provincias cubanas máis tranquilas, coñecida por ter un dos complexos hoteleiros máis importantes do país (Guardalavaca) e porque nela está Birán, o pequeno pobo onde naceu Fidel Castro. Eu non fun a ningún dos dous sitios, e só estiven na capital (Holguín) e en Gibara, un pequeno pobo mariñeiro, onde se estaba a celebrar o Festival de Cine Pobre.
Aquí estou eu na Loma da Cruz, un pequeno monte ás aforas de Holguín, cunhas vistas panorámicas impresionantes da cidade. Como o seu nome indica, tamén hai unha cruz por alí, que se puxo a finais do século XVIII para aliviar a sequía que se vivía no país. Non sei se aliviaron a sequía, pero xa vos digo que calor aínda fai de carallo. Para morrer!

Ver resto de la entrada »

Publicado en Fotos, Viaxes | 3 comentarios »

26. Mayo 2010 by Outes.

Aquí subo algunha foto máis da miña viaxe polo Oriente cubano. Realmente Guantánamo non ten moito, pero a cidade é tan agradable que vale a pena coñecela.
Este son eu na mítica praza que teñen todos os concellos cubanos, no medio do povo e cunha igrexa. Vaia cara de guiri! O carteliño estaba xenial para ver cara onde podías moverte na provincia, sentíame como un alemán andando pola Zona Vella de Compostela…

Ver resto de la entrada »

Publicado en Fotos, Viaxes | 3 comentarios »

11. Mayo 2010 by Outes.

Segunda parte da sección de fotos da viaxe a Santiago de Cuba!
Sesionando na Universidade de Oriente. Parece que sexamos a Asemblea Xeral de Nacións Unidas, está clarísimo non? Falaba a delgada de Irak nese momento.

Alfredo e máis eu. Olliño ó look, con guayabera! Mami, síntoo moito, pero non creo que me vaias ver vestido así máis na vida.

No Cuartel Moncada con Alejandro, Roi e Luis Carlos. Aquí foi onde o 26 de Xullo de 1953 se fixo o Asalto levado a cabo por máis de 100 homes, dirixidos por Fidel Castro e Abel Santamaría. O intento fracasa, morrendo asasinados a maioría deles, e o resto encarcelados durante 2 anos até a amnistía. Supón o primeiro intento armado por parte de Fidel de tomar o poder, e deste intento nace o Movemento 26 de Xullo, a organización de maior importancia durante a revolución cubana. Nós estamos na entrada ós almacéns de armas, por onde intentaron entrar os rebeldes, onde se poden ver os buratos causados polo tiroteo.

No val da Prehistoria, nas aforas de Santiago de Cuba. Un hipopótamo raro intenta comerlle unha perna ó pobre Isnel.

E esta foto está adicada á xente que visita fielmente o meu blog. Menos mal que sodes meus pais e 4 máis, porque vaia foto. Dándoo todo bailando salsa en Cuba, que non se diga!

Publicado en Viaxes | 7 comentarios »

28. Abril 2010 by Outes.

Para non aburrir á xente con posts longuísimos sobre a miña viaxe, a ver se fago un resumo a base de fotos en varias entradas, que así vós aburrídesvos menos e eu gaño horas de vida!
Podemos dicir que a viaxe comezou dun xeito bastante especial, cando no aeroporto descubrimos que iamos viaxar nun YAK-42D, o famoso modelo no que se mataran os soldados españois fai uns anos, e que nunca foron enterrados onde debían. Primeira vez que monto nun modelo soviético (aínda que xa de fabricación rusa). Como todo o feito polos soviéticos, grande, pesado, incómodo, pero ben feito. Interesante!

Estos somos unha parte da delegación enviada pola Habana ó evento. Estamos na Praza Céspedes, centro de Santiago de Cuba. Ó fondo, o Concello, e á esquerda estaría a casa de Velázquez, a máis antiga conservada en Cuba. Detrás, a catedral de Santiago. De esquerda a dereita: Laura, eu, Jessi, Leyanis, Roi, Luis Carlos, Anay e Lucía.

Antes de subir á igrexa da Virxe do Cobre, un dos edificios máis bonitos que vin en todo Oriente, e cunha panorámica impresionante do val que a rodea e as minas de cobre que hai ó lado. Somos xente das delegacións da Habana e Pinar del Río. De esquerda a dereita: Roi, eu, Laura, Ana María, Leyanis e René.

Sección masculina da delegación da Habana dende a Virxe do Cobre. De esquerda a dereita: Luis Carlos, eu, Alejandro e Roi.

O día da Inauguración de ONUCARIBE’10, na Praza da Revolución Antonio Maceo, en Santiago de Cuba. Non se ve o monumento a Maceo porque era demasiado grande para sair na foto. O que se ve detrás son lanzas, en realidade hai 26, que simbolizan cada disparo que recibiu Maceo durante a súa vida. Como curiosidade, desos 26 disparos, 8 recibiunos na mesma batalla, e SOBREVIVIU. Por algo se lle chama o Titán de Bronce. É o meu personaxe histórico cubano favorito, sen dúbida!
Por certo, vestir así dá noxo. Premio a quen me atope!

E por último, sen vir moito a conto, para a xente que di que teño que cortar o pelo. Imaxinades que o tivera así? O aire da camioneta na que iamos púxome o pelo así, non te preocupes mami!

Publicado en Fotos, Viaxes | 5 comentarios »

26. Abril 2010 by Outes.

Quince días despois de sair, rematou o meu minitour polo Oriente cubano! Finalmente 8 días en Santiago de Cuba, 2 en Guantánamo e outros 3 en Holguín.
Cheguei o Domingo pola mañá, tiven que pasar 36 horas na terminal de omnibus, 12 horas de viaxe en guagua, e cando cheguei á beca non tiñamos ascensor, así que tiven que subir os 16 pisos ca mochila e unha caixa de 10 kilos de comida, así que aínda estou un pouco encabronado.
Hoxe prometo poñerme a respostar os correos que teño pendentes, e a ver se subo algunhas fotos da viaxe. Se tardo uns días nos correos, pido disculpas, pero estou atrasadísimo nas clases e teño que poñerme ó día!

Publicado en Blog, Viaxes | 3 comentarios »

9. Abril 2010 by Outes.

Despois de participar en HAVMUN ‘10, fun seleccionado xunto con outros 6 compañeiros para participar nun evento similar, pero na Universidade de Oriente, en Santiago de Cuba. Neste caso representarei a Afganistan (Karzai 4tw! A defender a invasión!), na Asemblea Xeral de Nacións Unidas. Os temas son loita contra a droga e seguridade alimentaria, así que vai estar moi divertido! 

O importante do asunto é que marcho a Santiago de Cuba unha semana en avión ca viaxe paga, e alí durmimos nunha Residencia, así que tampouco vou ter que pagar, o que me dá a oportunidade perfecta para coñecer a cidade de forma barata. Ademáis teño a sorte de que a semana próxima (a do 19 de Abril) é a Semana de Playa Girón, polo que non hai clase. Aquí non se celebra Semana Santa, celébrase PLAYA GIRÓN cunha semana de vacacións. 

Despois de rematar o evento quédanme 8 días que aproveitarei para coñecer Oriente. En principio irei a Bayamo (capital da provincia de Granma), Guantánamo (Gitmo incluído…), Baracoa (tamén na provincia de Guantánamo) e Holguín (capital da provincia do mesmo nome). 

Non teño a máis mínima idea de se hai Internet por alá, sobre todo cando estea por provincias, así que por se acaso, eu despídome para os próximos 15 días! Igualmente, espero poder contestar correos (levo a computadora), pero non sei a que ritmo poderei contactar ca xente. 

Un saúdo a todos!

Publicado en Viaxes | 7 comentarios »

4. Febrero 2010 by Outes.

Perdón polo retraso posteando! Levo desaparecido uns 5 días porque aproveitei uns días libres que tiña para aceptar a invitación de Yasiel (un dos meus compañeiros na beca) para ir á súa casa en Cárdenas, na provincia de Matanzas. Para que vos orientedes, Matanzas é a provincia que linda polo oeste ca Habana. Cárdenas é a segunda cidade máis importante da provincia (despois da propia Matanzas), que se fixo mundialmente famosa nos anos 1997 - 1998 por ser onde vivía Elián González. É o municipio que queda ó sur de Varadero, polo que hai bastante turismo, sector no que se ocupa unha importante parte da poboación.
Nos 4 días que estiven por alí fixemos bastantes cousas, así que poño algunhas fotos para resumir a viaxe!

Ver resto de la entrada »

Publicado en Viaxes | 2 comentarios »

20. Enero 2010 by Outes.

Como algúns xa sabiades, esta semana estiveron de visita por Cuba meus pais. Como houbo algunha xente que me pedíu que subise máis fotos, e eu débome ós meus lectores (?), aproveito para subir algunha con eles!

Ver resto de la entrada »

Publicado en Fotos, Viaxes | 5 comentarios »

19. Enero 2010 by Outes.

O pequeniño que hai abaixo son as ruínas que se atopan no Machu Pichu. Ó fondo, o Wayna Pichu. Eu estou no cumio do monte Machu Pichu, a uns 3800 metros de altitude. As vistas máis incribles da miña vida

Publicado en Fotos, Viaxes | 4 comentarios »